LaTeX Beamer

Leider menge vill ze vill Leit dass Präsentatioune gläichbedeitend wire mat PowerPoint (oder Impress). Dass deem net sou ass weisen déi zwee bekannsten LaTeX Packages: Beamer an Prosper/HA-Prosper. Wéi sou oft hunn ech mech och an deem Beräich op mäin éischten Androck verlooss, an deen huet mer gesot dass den HA-Prosper e vill méi flotten an interessante Site huet wéi de Beamer. Wat e Feeler!

Ganzer 214 Säiten Dokumentatioun bréngt de Beamer mat sech. Honnerte vun Optiounen ginn ausféierlech erklärt a beschriwwen a maachen dëse Package wuel zur flexibelster an effikasster Manéier LaTeX-Slides ze erstellen. Kuckt äerch op alle Fall mol d’Beispiller un.

Wéi üblech huet een och an dësem Fall déi üblech LaTeX Vir- an Nodeeler. Mee ganz wichteg schéngt mer awer ze sinn dass d’Standard-Dateiformat PDF ass an net méi PowerPoint. Ween huet net schonn mol Kapp gerëselt iwwert eng Präsentatioun wou verschiddenes net méi ze entschlëssele woar, well de PC op deem d’Präsentatioun gehale gouf net iwwert déi selwescht Schrëfte verfügt huet wéi den ursprüngleche Computer? Mat PDF ass dat kee Problem méi an als Bonus ass d’Präsentatioun zukunftssécher a plattformonofhängeg.

An net ze vergiessen: Et kann ee problemlos wëssenschaftlech Formelen integréiren ouni dass et a Klickorgien ausaart. An dat dierft fir vill Leit en net onwichtegt Argument sinn.

Een Nodeel huet dat Ganzt awer: kee vun de mär bekannte PDF-Viewer huet e Präsentatiounsmodus à la Powerpoint, an deem een um zweeten Display déi eigentlech Fullscreen-Präsentatioun lafen huet während een um Haaptschierm (Laptop) en Iwwerbléck iwwert all d’Slides huet.

Optesch Täuschung

Klick.

De Woody Allen an den Inspector Gadget

Wat sollen déi zwee scho gemeinsam hunn?

D’Musek!

Beim Ofspann vum Scoop woar ech schon e bëssen erstaunt dass ech déi Melodie vun irgendwou kannt hunn. Séier ass mer agefall wouhir, mee dass et dem Inspector Gadget seng ass féiert zu enger anerer Fro: wéi kënnt et dozou? Da muss et bal irgend e klassescht Stéck ginn wat d’Inspiratioun fir béid Produktioune geliwwert huet.

Wéi di meescht kleng Alldags„problemer“ kann och dësen mat e bësse googlen geléist ginn. Wourop ech awer eigentlech eraus wëll ass dee klengen awer interessante Site deen ech dobäi fonnt hunn:
Op kickassclassical.com fënnt een dës an nach vill aner bekannte Melodien, a wou se iwwerall benotzt gi sinn. Och als Klassikmuffel kann et interessant sinn, kuerz bis eranzelauschteren. E bësse Kultur huet nach kengem geschued :-)

A fir déi déi et interesséiert, de Scoop ass eng typesch Woody Allen-Comédie, kaum innovativ, mee allemol witzeg an unterhaltsam. An e leeft an engem Kino an deem et net no Pizza(!) sténkt.